21 лютага адзначаецца Міжнародны дзень роднай мовы.  У Лёзненскай цэнтральнай раённай бібліятэцы у рамках акцыі “Чытаем і размаўляем па-беларуску” праходзілі разнастайныя мерапрыемствы, прысвечаныя гэтаму дню. Бібліятэкары, пераапранутыя ў беларускае нацыянальнае адзенне, віталі чытачоў на беларускай мове.

Увазе наведвальнікаў была прадстаўлена кніжная выстава “Смак роднай мовы”, на якой змяшчаліся кнігі па гісторыі беларускай мовы, а таксама кнігі беларускіх аўтараў - як класікаў, так і сучаснікаў.

У падарунак кожны чытач атрымаў закладку з лагатыпам бібліятэкі і выказваннем аб роднай мове.

Дзень роднай мовы атрымаўся яркім і запамінальным. Той, хто наведаў бібліятэку ў гэты дзень, атрымаў не толькі беларускую кнігу, але і зарад добрага настрою.

21 лютага ў Кавалёўскай сельскай бібліятэцы-музеі для вучняў ДУА “Кавалёўскі яслі-сад пачатковая школа” прайшоў урок беларусазнаўства “Ведай мову сваю”, прысвечаны Дню роднай мовы.

Падчас мерапрыемства вучні пашырылі свой слоўнікавы запас і праявілі творчыя здольнасці. Яны адгадвалі загадкі, перакладалі рускія словы на беларускую мову, расшыфроўвалі прыказкі. Бібліятэкар Кісялёва Любоў Валянцінаўна правяла экскурсію па зале музея, дзе прадстаўлены прадметы народнага побыту. Дзецям трэба было назваць прадмет і сказаць, для чаго ён выкарыстоўваўся.

Гэты ўрок нікога не пакінуў абыякавым. Усе яшчэ раз упэўніліся ў тым, што наша мова самая прыгожая і мілагучная.

 На мерапрыемстве была аформлена выстава-прызыў “Любіце і шануйце роднае слова”, на якой былі прадстаўлены кнігі беларускіх пісьменнікаў для дзяцей.

У Пушкоўскай сельскай бібліятэцы прайшла гадзіна роднай мовы «Далучыць да роднай мовы». Удзельнікамі мерапрыемства сталі выхаванцы старэйшай групы ДУА “Пушкоўскі яслі-сад”.

Бібліятэкар Вольга Валянцінаўна Ігнацік расказала дзецям пра гісторыю ўзнікнення Дня роднай мовы, пра неабходнасць захавання беларускай мовы і пазнаёміла хлопчыкаў і дзяўчынак з кнігай У.Ліпскага “Я тут жыву”.

 Дзеці з цікавасцю слухалі і ўважліва разглядвалі кнігу, а таксама адгадвалі загадкі, рэбусы, перакладалі словы з рускай мовы на беларускую.