8 красавіка ў дзіцячай бібліятэцы прайшоў дзень “Беларускай кнігарні”, прысвечаны беларускай  літаратуры. Чытачоў сустракала юбілейная выстава-парад “Сузор’е імёнаў”. Тут было прадстаўлена шмат яркіх, маляўнічых, цікавых па змесце і рознабаковых па тэматыцы кніг!

На эка-літаратурную вандроўку “Лес на далоні” па кнігах Х. Гурыновіча юных кнігалюбаў-эколагаў запрасіў Лесавічок. Разам з галоўнай гераіняй казкі “Чырвоная Шапачка” дзеці пабывалі на сунічнай палянцы, слухалі вершы, адгадвалі ягадныя загадкі.

Паэтычная гасцёўня “Лёзненскі вянок” была прысвечана Лёзненшчыне літаратурнай, ад знакамітых Міхася Лынькова і Генадзя Пацыенкі да самадзейных паэтаў. Чытачы зноў сусрэліся з Міколкам- Паравозам, ваякам Мішкам і казлом Вясёлая Барада.  Прагучалі вершы лёзненскіх паэтаў У. Лісіцына, Г. Кузьмянкова і У. Бандарэнкі. Слухачы і самі паспрабавалі сябе ў літаратурнай справе: рабілі пераклады з рускай мовы на беларускую і наадварот, падбіралі рыфмы і сінонімы.

Госцем сустрэчы стала паэтэса Анжэліка Лампіцкая, аўтар дзіцячых вершаў, якія вельмі спадабаліся наведвальнікам гасцёўні.