9 снежня ва ўсім свеце прыхільнікі таленту Максіма Багдановіча адзначаюць дзень нараджэння беларускага генія. Шматгранная асоба таленавітага творцы пакінула  зорны след не толькі ў гісторыі беларускай нацыянальнай літаратуры, але і ў літаратуры сусветнай. Паэт, празаік, удумлівы крытык і перакладчык, Максім Багдановіч свой тонкі мастацкі густ і далікатнае адчуванне рэчаіснасці ўвасобіў у сваіх незабыўных творах. Натуральна, што кожны верш генія загараўся на небасхіле паэзіі новай зоркай.

        У рамках тыдня беларускай літаратуры, што праводзіца ў СШ  №2, раённая бібліятэка запрасіла юных чытачоў на літаратурна – музычную кампазіцыю "Маладыя гады, маладыя жаданні…”. Бібліятэкары расказалі аб жыцці і творчым шляху паэта, але галоўнай тэмай размовы стала тэма кахання ў творчасці паэта. Каханне у творах М.Багдановіча гэта пачуццё бязмернай павагі да жанчыны, прасягнутае промнямі дабрыні і веры ў чароўныя сілы сапраўднага кахання. Вершы М. Багдановіча, музычныя творы на словы паэта прагучалі на сустрэчы. Літаратурная віктарына "Што мы ведаем пра Максіма Багдановіча?” пашырыла веды вучняў.  Літаратура, змешчаная на кніжнай выставе, пазнаёміла чытачоў з літаратурнай спадчынай паэта, яго кароткім жыццём.